Sarapa iltija huN, aur chup huN

Sarapa iltija huN, aur chup huN
maiN kya kya dekhta huN, aur chup huN

wafa k daeiry meiN huN muqayyad,
sabhi kuch janta huN, aur chup huN

bhula beTha huN tery her sitam ko,
ghamoN ka silsila huN, aur chup huN

udoo ho, jaan-e-jaN ho ya koi aur,
her ik se aashna huN, aur chup huN

hazaroN aandhiaN, lakhoN haiN toofaN,
maiN gir gir k uTha huN, aur chup huN

bata kr raasta chalty bany ho,
saraboN meiN khaRa huN, aur chup huN

hawa jab gudguda'ay chandni ko
kisi ko sochta huN, aur chup huN